Коцік Петрык і Мышка

Беларуская народная казка

  Аднаго разу коцік Петрык захацеў Мышку злавіць. Ен быў яшчэ маленькі, але чуў ад дарослых катоў, што яны заўсёды ловяць мышэй. I Петрыку вельмі ж захацелася стаць хутчэй дарослым. Пайшоў ён у гумно. Хадзіў сюды-туды — нікога няма. Раптам у кутку нешта зашамацела.

  Петрык скокнуў туды і ўбачыў маленькага звера.

  — Ты хто? — спытаў Петрык.

  — Мышка.

  — Вось ты мне і патрэбная.

  — Навошта?

  — Я не ведаю, навошта, але ведаю, што катам трэба лавіць мышэй.

   Мышка пасмялела і кажа:

   — Каты ловяць мышэй, каб гуляць з імі ў ката і мышку.      Хочаш, навучу цябе?

  — Хачу! — сказаў коцік.

  — Тады стань у куток, заплюшчы вочы і лічы да трох, а потым лаві мяне.

   Спадабалася гульня Петрыку. Ен стаў у куток, заплюшчыў вочы, а калі далічыў да трох, Мышкі было ўжо не дагнаць…