Першыя сняжынкі

Янка Журба

Лётаюць, сыплюцца

Зоркі-сняжынкі -

Белыя, лёгкія,

Быццам пушынкі.

Роўна так сцелюцца

Ў вёсцы і ў полі,

Кружацца, кружацца

Ціха, паволі.

Дзецям тут весела,

Хоць і марозна:

Цёпла за гульнямі,

Зімна не грозна.

Шумна забегаем

Тут удагонкі,

Гулка пакоціцца

Голас наш звонкі.

Жыва праложым тут

Новыя сцежкі,

Дружна наладзім мы

Гульні у снежкі.

Лётаюць, сыплюцца

Снежныя зоркі...

Будзем на саначках

Ездзіць мы з горкі.