Вавёрка

Янка Журба

Я — рухавы звярок,

Заўжды весела мне.

Мая хатка — дупло

На высокай сасне.

Я на дубе нарву

Шмат буйных жалудоў

I к зімовай пары

Прынясу іх дамоў.

На галінках сасны

Я грыбоў насушу,

Іх багата к зіме

У свой дом нанашу.

Я — рухавы звярок,

Шмат арэхаў знайду,

Самых лепшых нарву

I ў дупло накладу.

Не баюся зімой

Я марозаў ліхіх:

Спачываю ў дупле

На лісточках сухіх.

А як сонца зірне,

Я скачу па сасне.

Цёпла ў шубе маёй

І суровай зімой.